2013年7月4日 星期四

七年前後 (1):《超人-強戰回歸》怪你過份美麗



             2006年睇完《超人─強戰回歸》離場時,聽到不少怨聲載道,這邊廂:「吓!用兩個半鐘嚟話我知:超人原來有個仔,嘥氣!」那邊廂:「嘩!好乜悶,中間果段真係瞓著咗!」再有後生仔說:「果光頭佬都唔知喺度搞乜?超人啲敵人渣唔渣D呀!」當然,亦有好多少女們不斷回味:「真係好靚仔呀!皮膚又靚,又有型,好多近鏡都映到佢好靚呀!一定要睇多次!」

        事實上,今次超人回歸,感覺似係純為Fans而設居多,新生代只怕嫌它節奏太慢,勝在新版超人夠靚仔,加上出現好多關於首兩集的前因元素,未睇過肯定若有所失,個人而言,其實每套漫畫改編電影版都有它的特色,今次Bryan Singer其實百分百忠於舊版精神,連電影節奏都同樣保留,超人電影向來都是呢個Beat

        開場沿用首集的原裝Opening設計及John Williams配樂,對於Fans肯定睇得感動,尤其曾經歷過1978年大戲院時代欣賞過的一族,筆者亦有相同的情意結,特別去到JP銅鑼灣觀賞,就是想尋回當年明珠戲院弧型大銀幕初遇超人大電影的童年回憶,如今JP銅鑼灣正是當年明珠戲院的超等位置,慶幸尚有大銀幕帶來視聽震撼,那些立體Credit字飛出飛入的視覺效果,迷你戲院肯定屬兩碼子之事。



        基本上,今次故事是以承接1980年《超人續集》的劇情,講述超人五年後再回歸,女友Lois已結婚了,卻揭露Lois兒子原來就是超人之子,想知點解?《超人續集》早已講述超人為愛情甘願變成平凡人,並於水晶宮內跟Lois發生關係,只是片末超人一吻令她忘記所有;說回Lois一角,今次新版選角絕對不討好,Kate Bosworth予人太囂張之感,不及舊版Ned Beatty傻可愛的純真美。

        再細心留意,今集有好多場面都是向首集致敬一樣,好似首集有超人救空軍一號,今次就救穿梭機連飛機,且有超人頂住飛機翼同一鏡頭;超人跟LoisDaily Planet大廈轉門夾住,又是首集出現過;Lois首集坐直昇機出意外,今集又再坐飛機遇意外,超人救完她說出相同的「搭飛機仍是安全」對話;壞人Lex Luther同樣搞新土地計劃;超人之父馬龍白蘭度的影像重現…等,可謂是向Fans玩尋寶遊戲考記憶。



        想一想,超人多年來出動救人的原因,佔重九成都係Lois有意外所致,而Lois就總易招惹意外,單是搭直昇機、飛機、地鐵、又或駕車等,明明沒有壞人搞事,都可以無端出事,另外,Lois例必逢凶化吉之餘,本身都幾似超人,今次在飛機內拋來拋去,又在沉船時被鐵門撞擊,同樣絲亳無損,真厲害!然而,一向以正義之士為名,超人今集似乎又有損聲名,利用透視眼偷睇Lois家中活動,行為如狗仔隊之流,更明知Lois已為人妻,偏相約她再來浪漫飛天之旅,難怪有人因此變成你憎超人。

此為2013修改版本 /  原文刊於AV Magazine @ 28/7/2006)



Bonus Track : 1978年由Richard Donner導演拍攝的《超人》電影,是次入戲院睇電影的深刻體驗,更成為個人童年最珍貴的回憶片段之一,當年的明珠戲院(即現在JP銅鑼灣的前身)可是全港數一數二的大型戲院,最享負盛名的正是其超弧形大銀幕設計,在當時來說絕對達到視聽一流表現,尤其是《超人》電影最經典的開場序幕,所有Credit名單都是以立體形式飛出飛入,就算當年沒有3D,已令觀眾睇到眉飛色舞,更重要還多得John Williams那首振奮人心的超人主題音樂,單是序幕場面已夠令人津津樂道三十幾年。


沒有留言:

張貼留言