亞里叭叭 : 點解要選美?

　　原來今晚又選港姐，借機跟大家分享10年前呢篇舊文.......

　　如果有競爭才有進步，那麼，參加選美就是從鬥靚中得到進步，即是唔靚都可以變得靚？要嬴就要我要靚過你，如此比賽規則基本上幾無聊！

　　實在，一直都好唔明白「點解要選美」？一班人走上台鬥靚，即是首要自覺好靚先夠膽上台，然後就給台下一班人評頭品足，決定閣下到底是否好靚？心想，鬥靚本身就是有問題，憑誰來定斷靚定唔靚？憑分數？你靚佢多1分？多2分？點計？點分？

　　所以，有關方面就想出甚麼「美貌與智慧」並重口號，即是說明靚唔代表一切，仲要有腦，於是就大搞IQ問答考急才，結果，台上真係「美貌與智慧」並重，選美的繼續Sell美貌，司儀們才是Sell智慧，問非所答，詞不達意，還要用半鹹淡廣東話，問你唔明，答你又唔知講乜，最後全靠司儀急才盡顯打圓場，如此就是「美貌」與「智慧」兩者並重，明未？

　　如今香港不只要選小姐，而是想選埋香港家庭，出場都要由父親或男親友陪伴，且要開口講埋參選政綱，於是大家不斷聽到幾個月改造後唔認得個女、身負重任、搞好香港經濟及旅遊業發展、世界和平、香港和諧…等，不看電視畫面，還以為在選特首，原來港姐同特首工作一樣咁身負重任？香港市民，你知道嗎？

　　那麼，上屆港姐一年內又做過甚麼？原來就是做義工、去老人院、去探訪這、去探訪那…不用選港姐，你都可以去青年中心報名做得到，同時一樣可以學埋化妝儀態，又一樣可以結識到好多新朋友，不過，就是冇得上電視出鏡，被雜誌追訪，冇后冠冇獎金冇獎品。

　　如果問你知不知舊年或前幾年港姐是誰？恐怕你跟我也不太清楚，就只知道每逢台慶過時過節，坐於Uncle 6身邊兩位戴后冠的，就是上屆港姐，點解她們仍要戴后冠出鏡？就是因為沒有后冠，怕大家又再搞不清楚吧！台上司儀說今年開場老豆拖住個女出場似嫁女，其實，電視機前有幾多人會覺得似婚禮？反而好多人更即時覺得似為豪門揀新抱，又或富豪揀新女，此類賽後報告年年都長期成為八卦雜誌追訪目標，由鬥靚起步，演變成鬥豪門、鬥身家、鬥架勢、鬥出名…

　　好不明白，幾十年來的選美比賽，一眾佳麗總要叉住條腰對答，難道這就表示有儀態嗎？日常生活中，大家幾時會見到有人叉住條腰說話？有，通常都是潑婦罵街之時，一邊叉住條腰，一邊手指指鬧人，所以見到眾佳麗不自然地叉住條腰對答，總是怪怪的，仲要叉足幾十年不變！

　　幾十年不變的，還有那些假掌聲，假到似落雨聲效，偏偏年年如是，呢個假掌聲Effect應該Update一吓，紅館拍掌聲點會咁削？

(原文刊於AV Magazine@15/8/2006)