始於
2003年,
「睇驗生活」專欄AV Magazine刊出,至2013年6月完結, 沿途分享音樂、電影、電視、廣告、生活、時事…多元感想, 由個人週記化成民生紀錄, 如今首度網上改版重生, 回味十年喜怒哀樂, 繼續延伸未來僅存的共同記憶體

2016年7月15日 星期五

《寒戰2》: 點解咁好笑?


 《寒戰》首集以香港警隊權力架構內部鬥爭做主題,講政治陰暗面,配套一觸即發的恐襲香江做動作賣點,上回借用Tony Scott《紅潮風暴》做參考藍本,尚算引人入勝,今回李氏父子跟幕後集團誓不罷休企圖掌控香港未來的延伸,卻換來笑話一場,明明應該好緊張,點解愈睇愈好笑?

  開場即聽到觀眾驚訝地問:「乜架衝鋒車仲未搵番?」心想,搵番你就唔會坐響度睇續集喇!然後,銀幕接著傳來一段發音怪怪的英文發言,原來是劉處長向上集殉職警司葬禮道詞,其後全片亦不斷中英對白大兜亂,究竟如何決定幾時講英文?好像簡大狀與劉處長同步畫Board分析李文彬,甚麼Power/Family/Money/Personal之類,你中我英,十分造作又礙耳。

  周潤發扮大狀模仿立法會會議質問官員,想扮雄辨滔滔卻吃力不討好,對Digital Analogue之別的執著,品味就是任性,當其手下陣亡,還有閒情從雲端取來相片檔案再沖晒一張黑白照片,一場為發哥度身訂造的晒相示範show,換轉是音響發燒友,是否需要將偷錄聲音從雲端取來的audio file,再轉錄到卡式帶給警方?

  劉傑輝與李文彬破口對罵是否變成指定名場面?任你如何花心神排練都是徙勞,真心覺得只是一個嘈字,完全強化不到二人仇恨層次,反而今回不經意的爆粗駐腳:「如果乜乜乜,我就唔X叫做李文彬!」,引來全場大笑,心想,你改名換姓關人鬼事?有其父必有其子,李家俊揚言要挑戰警隊一哥未免流於一般,不如直斥「挑,香港警隊喎!」更有挑釁性吧。

  笑源陸續有,用咁大架航拍玩追蹤,隊友還好意思溫馨提示「唔好飛咁低怕被發現」,看過《天眼狙擊》必笑到反肚,灣仔追車轉入莊士頓道,明明船街就在面前,點解仲花一輪兜來又兜去,為的就是讓李家俊出口術?King Maker背後黑手是否暗示中共,如是者,又何需搞咁多場大龍鳳?全片配樂出奇地比郭富城更overacting,導致畫面跟著配樂為緊張而緊張,營造過份煩厭的凝重氛圍,當然,TVB老將大雜會是另一奇觀大發現。

 《寒戰2》點解咁好笑,其中重點出於選角問題,仍要盲信上世紀星光熠熠就是賣座保証,排面明明想拍一套好認真嚴肅的政治陰謀片,偏偏搞到成套八十年代群星賀歲片,全程人肉佈景板如一場TVB耆英聚舊Show,愈睇愈失真是必然,其他如方健儀及伍家謙亦未成「戲」候,方健儀忽然以女警司角色客串亮相,現場觀眾真的笑出來問候:唔X係呀嘛?拍警訊呀?


  想真一點,《寒戰2》跟《天煞2》都幾殊途同歸,人哋有前任美國總統捲土重來又再做話事人,完全將新任女總統置諸不理,又親自駕機直搗黃龍,我哋都有前任警務處處長隨便返回總部指點江山,現任的竟又親自駕車護送重犯,人哋打外星人,我哋就仲未知打乜嘢人(好似暗示係自己人),目前所見,不外乎又是虎頭蛇尾的所謂背後集團組織,十足007又或Ethan Hunt近年碰上的所謂神秘強大組織,最後不堪一撃,有頭威冇尾陣得啖笑收場是慣常事,其實今次《寒戰2》序幕冰人槍戰設計亦學足007手法。

(此為加長版本,原文刊於U Magazine@14/7/2016)