《靈異空間》: 瀕死圍你孽隨身

　　27年前，Joel Schumacher首將瀕死主題搬上大銀幕，5位當代新星帶大家走入靈異空間，口碑一般，如今重拍是否可以加多點新意？結果，片如其名Flat到乏魅，瀕死純屬噱頭，編導似乎全心想拍荷里活鬼片，完全捉錯用神，倒不如睇回原版更實際。

　　首先，既然找來原版的Kiefer Sutherland飾演醫學院教授Dr. Barry，何解不以Nelson Wright角色延伸拍續集，為瀕死進行更深層探究，偏偏捉到鹿不脫角，只讓他行行企企客串兩鏡，找誰演也可以，多此一舉，然後又再找來5位醫科生重蹈覆轍，求其逐個玩瀕死再撞邪就算，認真嘥戲！

　　據知，最初構思Dr. Barry與Nelson Wright真的是同一個角色，Nelson因經歷首集事故後而改名為Barry，甚至曾打算有以下對白：「你是不能欺騙死亡，相信我，我是知道的…」，是向原版影迷來個驚喜共鳴位，不過，整個構思最後完全被刪掉棄用，可惜！

　　一切由片首兩姊妹車禍而來，Courtney借瀕死求見亡妹成罪魁禍首，身邊同學全屬為私心貪過癮從旁參與，繼而輪流展開自我救贖之旅，主題由瀕死變成講佛計，萬般帶不走，圍你孽隨身，死前最放不低是個人罪孽，死而復生，就要贖罪解脫，否則異象只會死纏爛打直到永遠。

　　問題是幾條瀕死贖罪線完全獨立零互動，觀感等同睇緊幾個《迷離境界》單元故事，弊在是同一個主題，劇情平平無奇，進展沒精打采，主角個個都有鮮為人知的罪行，越睇越似Jigsaw從中作梗的一場靈異審判遊戲，意想不到是，全片最有意思的公民意識，來自Courtney亡妹的怨氣不滅，教訓大家駕車不要玩手機。

　　27年前後，靈魂出竅等同迷幻境界沒大不同，玩瀕死媲美啪丸仔自High，仍是最強烈的觀後感，激活腦神經細胞更是最佳附贈品，當眾人見証Courtney開竅升呢急變高材生，個個財迷心竅，為攀上精英階梯，爭相冒死一試，瀕死實驗研究最後要毀屍滅跡收場，咁即係點呀？

　　沒錯，人人都帶著此問號離場，除非你睇個場有卓飛的分享會殿後，可以聽多些有關瀕死真實個案，否則，本片根本掛瀕死賣驚慄，不如直接叫 《靈異凶間》吧！

(原文刊於U Magazine@9/11/2017)