如此掛「反烏托邦」之名販賣低智流行小說源源不絕，荷李活鬧編劇荒，促成濫製改編潮，套套不外如是，一年一部曲分拆上市是指定搶錢動作。
《分歧者》系列創作藍本又是《1984》無限變奏重生，兩年前初曝光講異種叛逃，去年叛亂者花兩小時解構一個潘多拉盒子，謎底就只是天外有天，話你知外面世界那麼大，延伸今年赤誠者勇闖新世界又如何，最後仍是乜乜者未夠醒覺，繼續沒完沒了笨鬥笨下去。當然，論選角Shailene
Woodley與Theo James絕對比其他同類片優勝，起碼大眼妹Shailene明顯較Jennifer Lawrence易討人心。
講真，沿途百分百似曾相識炒雜錦，翠絲跟4號協力推翻舊時代，新領導重蹈覆轍玩權力政治，又來多次《飢餓遊戲》大結局，翻牆破壁尋覓新出路，又發現跟《移動迷宮》異曲同功的實驗大陰謀，仲有《關鍵第4號》，算吧喇！
甚麼以誠實、無私、勇敢、和平及智慧分劃派別扮維穩，最終又不是殊途同歸收場，人始終是人，更何況這個芝加哥等同笨人之城，偏偏遇上城外獨裁掌權者大衛，亦是豬一般的對手，真的痴呆坐一枱，愈睇愈失笑非常。
笑料停不了，Tori
Wu危牆上傾談被射殺是蠢人行為，怪不了誰，鏡頭舖排早已預告；二五仔Peter Hayes三番四次玩出賣，主角仍願將他留低同行，傻的嗎？翠絲跟4號上戰場如拍拖，生死存亡關鍵時刻仍要慢鏡咀兩咀搞浪漫；所有總部大樓依然自由行般，戒備近乎零，主角隨時輕易自出自入，亳不合理得啖笑。
反觀大衛不可一世的傲慢個性，全程隻手遮天玩蟻民，形同特區首長，將芝加哥搞分化搞內鬨，企圖瞞上欺下的獨裁行為，不難令水深火熱的本土觀眾對號入座，再看不同黨派之爭，媲美立法會內外的拼圖遊戲對對碰，下集推倒大衛下台事出必行，幾時到我哋？
（原文刊於U Magazine@17/3/2016)
沒有留言:
張貼留言