2016年3月11日 星期五

《倫敦淪陷》: 黑警佔英反世界


  3年前突襲白宮鬧孖胎,以《白宮淪陷》北韓恐襲重火力硬闖先拔頭籌,末日名導Roland Emmerich《白宮末日》完全給比下去, 如今「淪陷」系列搶灘成功,同一班底搞完白宮搞倫敦,換來伊朗導演Babak Najafi接手,依然保持上回絕冇冷場水準, 《虎膽龍威》超強接班人Gerard Butler愈戰愈離地。

  開場倫敦六國大封相,殺盡多個國家元首,全賴英國黑警多的是,恐襲組織形同ISIS預告,以公開斬首美國話事人,改變新世界秩序為首任,強勢來襲,先聲奪人,比北韓恐怖分子13分鐘攻陷世上最堅固堡壘更上一層。 

  全球最嚴密保安系統之國也有失守時,世事無絕對,信不信由你。

  這個總統當然死好命,跟最強特工Mike拍住上,二人游走倫敦無人街道媲美《28日後》,沿途一打幾十易過打喪屍,刺激度比白宮暗黑困獸鬥截然不同,Mike出招更快更狠,MI6安全屋盡顯機智升呢不少。

  後段主打倫敦街頭巷戰,其中一場長鏡頭一Take過跟隨Mike及特種部隊共同進退,拍出實戰迫力,心思不俗,到壓軸Mike獨戰終極大樓媲美《突擊死亡塔》,遇敵殺敵關過關,就只不幸中一槍,流一點血,比正義聯盟會員更強。

  問題是,兩集「淪陷」恐怖集團頭威犀飛利,尾陣超廢趕收場是指定動作之餘,成員可以輕易群體潛入政府無間道才是最說不通,黑警內鬼總有一個響左近,連環恐襲,部署經年,英國國防部防不勝防,就算派出占士邦都肯定大敗收場,一個美國超強特工Mike愛妻愛國愛護駕主公,足令占士邦汗顏不禁。


  最後,倫敦淪陷美帝救,大美國主義盡掩大英帝國,一眾他國元首既同遭被捉弄暗諷,且死無全屍收場,你炸我,我炸你,又你虞我乍,點解美國咁多仇家?大家心照吧!

(原文刊於U Magazine@11/3/2016)

沒有留言:

張貼留言