《死侍》: 搞乜鬼變種特工

　　我的外甥問：「同樣擁有不死身，如果狼人跟死侍對戰，邊個會嬴？」我答一定係死侍，因為口水多過浪花，煩都煩死狼人；沒錯，《死侍》應該是漫畫英雄系列中，最多對白又最反英雄主義的頭號異端分子，只因睇得太多眼花撩亂的CG英雄，套套大同小異叫悶時，《死侍》忽然反傳統起革命，玩味媲美《勁揪俠》。

　　以披上死侍裝束的Ryan Reynolds棟篤笑為主打，既保留超級英雄指定正邪對壘，更同時落力寸盡荷李活，對白句句夭心夭肺，是笑足全場、大半場或半場，視乎閣下對荷李活電影有多認識，跟《搞乜鬼》系列有異曲同功之妙，最抵死是Ryan Reynolds不忘分享自己的從影體驗，由旁白自述到對住鏡頭跟觀眾直言，完全非一般的拍攝玩法，真過癮！

　　全片只有兩場動作大場面，開首公路埋身槍戰，三級暴力美學賞心悅目，乍看死侍身手動態，有幾分似揸了槍的蜘蛛俠，壓軸背景以一艘荒廢航空母艦大對決，令人想起《復仇者聯盟》，又真有變種特工小聯盟內戰之餘，死侍照寸爆自己友，甚麼「超級英雄式落地」或「兩條友住咁大間X-Men學院」，且多番暗寸電影公司投資有限，認真大無畏到極。

　　正如死侍自言：這本是一套愛情片，其實更似典型韓國悲喜愛情片，Wade Wilson與Vanessa嗅味相投的一對完美戀人，絕症來襲，離合聚散，情義兩心知，Wade說要多看她一眼，簡單直接，拍出叫人動容的效果。

　　回歸街頭，拒絕離地是大勢所趨，《死侍》亦深明《勁揪俠》成功本色，少不免被擺上枱戲謔Ass番，完場不少觀眾期待結尾Bonus，死侍明示續集有Cable登場，最後提醒大家保持戲院衛生就完了，離場聽到一些不滿之聲，又說動作場面咁少，始不及《鐵甲奇俠》咁好睇，畢竟，給寵壞了腦的普羅觀眾仍多得是。

（原文刊於U Magazine@19/2/2016)