《戇Scout打爆喪屍城》：索女‧戇Scout‧喪屍城

　　換轉八年前，多得塔倫天奴及Robert Rodriguez，時興玩懷舊七字片名，本片肯定叫做《索女‧戇Scout‧喪屍城》也說不定，今時今日喪屍片熱潮仲有得玩，又多得The Walking Dead死不斷戲，喪屍就好似百搭主旋律，Crossover甚麼都依然萬試萬靈，今次輪到童軍末日救未來，齊來戇Scout Forever！

　　全片散佈陣陣八十年代冇厘頭黑色幽默餘韻，愈睇愈似當年劉鎮偉《猛鬼》系列喪笑本色，三個半熟戇Scout少年，加一個索女戰士打爆喪屍城，將性的好奇跟血腥暴力共冶一爐，少少鹹多多喪，香艷脫衣舞孃突變喪屍來襲，如《殺出個黎明》變奏版，鹹濕仔不忘向一對「喪波」抽水一幕，直情曹查理上身一樣，港產式同聲同戲。

　　為戇Scout大平反是終極目標，開首先盡情玩寸戇Scout有幾戇Scout，一切由Roger隊長男人幾十戇Scout Scout出發，Ben同Carter有眼見，二人早生退意，惟獨肥仔Augie卻此志不渝，友情大考驗過後，觸發戇Scout小宇宙，學以致用，殺出新血路，制服上所有勳章絕非浪得虛名，自己小鎮自己救，總算拍出點點喪屍新意思。

　　擅用不同年代流行偶像搞Gag有心思，最過癮跟Britney Spears迷的喪屍一起合唱《Baby One More Time》，到副歌Hit Me Baby應詞而生一招了，又或身為Dolly Parton狂迷的Roger隊長，以一首《9 To 5》玩轉家居大追殺，再到超市自組架生打喪屍，明顯將電玩《Deadrising》最負盛名的玩法實體重現，三件殺屍武器設定有跡可尋，當戇Scout遇上喪屍的荒謬笑不停是這樣。

　　當然，全片最爆笑的三級名場面，聯結「童軍跳彈床」同步上演，令人聯想八十年代《反斗星》(Porky)的昇華加料血腥版，另一個長舌喪屍又是十分抵死，沒錯，睇喪屍片必屬三級足本最大快人心，如果你被迫睇刪剪IIB級的話，肯定若有所失，戇Scout收場。

　　海報設計似將當年占士邦《For Your Eyes Only》玩另類致敬，當一雙性感誘惑美腿，頓變一雙折斷了的Scout Scout腳，你識笑的。

(原文刊於U magazine@5/11/2015)