始於
2003年,
「睇驗生活」專欄AV Magazine刊出,至2013年6月完結, 沿途分享音樂、電影、電視、廣告、生活、時事…多元感想, 由個人週記化成民生紀錄, 如今首度網上改版重生, 回味十年喜怒哀樂, 繼續延伸未來僅存的共同記憶體

2015年8月30日 星期日

《屈機起格命》: 末日打機救未來


 

   打機冇出息,是上世紀阿媽教仔的過去式,如今打機救未來才是正經事,既是電影橋段,極多真實個案,你看多少電子神童名利成就改變自己未來,《屈機起格命》亦有電子神童搞革命向現實表態,中年危機巧遇外星人襲地球,就算總統有幾無能,最緊要有個打機高手及陰謀論學者做死檔齊自救。

  承襲Adam Sandler八十年代情意結,回到1982年開心放暑假,一切由打機開始,如果你是4字頭肯定對號入座,重遇《食鬼》、《大蜈蚣》、《青蛙過河》、《大黃蜂》、《太空侵略者》及《Donkey Kong》等最早期經典電子遊戲,回想幾蚊一舖街機亂咁打的成長歲月,百般滋味在心頭。

  選取大蜈蚣做首個對戰對象是捉錯用神,如果轉由Space Invaders立體襲地球,肯定更好玩有Fun,試想當一整排太空侵略者列隊壓境,跟軍隊地對空攻防戰情況,已夠視聽之娛,其他電玩角色逐一比試,亦愈玩愈失戲氛,壓軸猩猩王未免過於兒戲,外星人Pixel化攻擊未夠盡,起碼未見全Pixel 城市亮相。

  玩轉八十,當代歌影視明星片段被轉化為外星人宣言有心思,食鬼變追車有鮮味之餘,穿Arcade制服捉食鬼,加上Dan Arkroyd客串,似暗向《捉鬼敢死隊》玩致敬,然而,大家或誤以為食鬼原創者Toru Iwatani粉墨登場,那個只是扮演他的日藉加拿大演員Denis Akiyama,此Im Your Father相認亦玩寸《帝國反撃戰》,今回變成老父右手出事;另外,最初數粒外星光體從天而降一幕,完全跟足《第三類接觸》同一組鏡頭調度處理。

  人到中年,回望輕狂歲月留低多少遺憾追憶,烙印記心,下站不明,不自覺質疑自己的存在意義何在?打機不知時日過又如何?活得自在就是了,試問日做夜做不停忙的現代都市人,有幾何會知時日過?是時候拿回封塵的雅達利及紅白機打過痛快,重新Reboot再戰人生下一Round

(原文刊於U magazine@28/8/2015)