《大英雄聯盟》: 大大嚿與小小超

　　英文片名《Big Hero 6》，調轉少少變成《Big 6 Hero》就大不同！近年荷李活都在強調未來就交給下一代接棒，以超凡兒童救未來為命題，好像《宇宙生還戰：安達的戰爭遊戲》及《怪誕小箱俠》，甚至《出埃及記》烈尼史葛亦以神童示眾，《大英雄聯盟》的機械人神童濱田廣也不例外。

　　英雄不分大與小？Size Does Matter？開場街頭機械人格鬥小戰場已說明一切，純真天才單挑強權霸王，以小敵大，食腦才是真實力，阿廣的創新發明microbots，同樣延伸小宇宙無限大概念，卻觸動再沒想像力的上一代神經，他們求自保維穩個人私利，從中作梗，刻意阻撓，促成為未來自由的全新格言：「不聽老人言，希望在眼前」。

　　到底我們又有幾需要英雄？《大》跟《勁揪俠》人人英雄理念同出一轍，阿廣亦跟Mark哥名句「只係要話俾人聽，我唔見咗嘅嘢我就要自己攞番！」無出其右，志同道合埋堆搞聯盟搞戰隊也好，最緊要知己知彼，阿廣為其他戰友潛能度身改造發光芒，醫神圓滑肥大都要修身強化變型，逃不掉先敬羅衣後敬人的形象包袱。

　　誰不想抱抱大大嚿醫神？成功集結《功夫熊貓》及《Wall-E》混合體，跟阿廣騎士式連體飛行則似《馴龍記》，冇電失效形同飲醉酒抵死搞笑，美日動漫風互溝通婚，東京三藩市二合一，變出一市兩地新視野角度有睇頭，整體外觀極易討人歡心，可惜內在劇本過於四平八穩，驚喜欠奉。

　　神秘大壞人造型，面具設計既似《中華英雄》鬼僕加《再生俠》變身，那個時空瞬間轉移機器恐怕是廿年前《Stargate》的同類產品，不妨留意，完場Credit後有隱藏片段做甜品，比餐前小點《美味盛宴》好味得多，《美》貪吃小狗見證12年主人拍拖結婚生仔，完全小可愛大悶蛋收場，內容空洞乏味，愈睇愈不奈煩，竟出自Pixar金牌製作人John Lasseter擔任行政監製，真Big Pan Zero！

（此為修改版本 / 原文刊於U Magazine@25/12/2014)