承接Stephen
King原著每隔27年小丑回歸之說，今年Pennywise終告起新見回魂，入場前，確對1990年電視電影版本念念不忘，先入為主少不免，結果一於所料，荷李活式驚慄全新包裝下，只算偶有佳句，整體有讚有彈。
故事主線跟舊版大不同，不再以少年及成年平衡回憶玩對接，由完全少年篇的第一章重新出發，再加上有四眼仔Finn Wolfhard主演，觀感形同《伴我同行》跟《怪奇物語》 新舊互動玩法，雖將The Losers Club友情相關照來得更細緻，Pennywise也加倍血腥暴力，造型百分百妖魔化，卻失去舊版正邪同體不寒而慄的吊詭個性之餘，也未夠充分凸顯團結就是力量的精神所在。
叛逆少年Henry與Beverly用激進手法向父權主義說再見，很反建制的獨立起義，而Henry黨派誓將黑人同學Michael趕盡殺絕，跟Michael雙親死於縱火案大屠殺，亦涉及種族仇恨背景，還有電視機不斷重播洗腦兒童節目，都帶來點點新驚喜。
全鎮盡是問題成年人，家家有個難頂父母，開場任由George橫風橫雨出街玩之同時，神秘媽媽獨自彈琴沿途伴奏已夠騎呢，其他如藥房老闆及學校老師等，冇一個是正常，眾主角最後出走到大城是必然。
個人最感不滿是加設小丑藏身地入口處，竟似足2006年同名動畫《古怪屋》外觀，硬來多一場「哈佬喂」鬼屋困獸鬥，倒拖拉節奏反效果，沒錯，巧妙引入1989年《猛鬼街5》在鎮上放映，再連接Pennywise學足Freddy大搞鬼玩人出沒場面設計，玩法比舊版層出不窮見心思，不過「3D幻燈片機」立體登場一幕就失笑多於失禁。
細心留意，片中有不少隱藏彩蛋，好像幾位主角不同的Tee，雪櫃上有《Twin Peaks》Laura Palmer同聲同戲玩失蹤，又或舊版Pennywise公仔快閃現身…等，至於飾演Beverly的Sophia Lillis愈睇愈似當年《艾曼妞》Sylvia
Kristel年青版模樣，當然，仍期待下集可以為Pennywise身世之謎大揭盅。
(原文刊於U Magazine@15/9/2017)
沒有留言:
張貼留言