《決戰中途島》: 中規中矩中途島

        入場睇《決戰中途島》純為追憶童年觀影體驗，回到1976年紐約戲院，父母帶我去睇當年宣傳為戰爭片皇之皇的《中途島戰役》，最深印象是特設「Sensurround」音效，如置身戰場打到嚟一樣，當時年紀尚少，對劇情不太明白，只記得好多戰機好多戰艦不停猛烈轟炸，相隔43年後，新版觀後感其實相差不遠。

       首先，交由Roland Emmerich執導已預告CG特技有保證，片長132分鐘幾乎打足三分二，先以偷襲珍珠港作前菜，擺明向18年前Michael Bay版本名場面挑機，連中途島戰役前因都用心拍埋，誠意可嘉，美軍上司犧牲自己救下屬與艦同葬，跟後來日本海軍將領山口多聞，戰敗與艦同歸於盡，前呼後應有心思。

        貴為二次大戰太平洋最經典海空戰役，原來當時日本零式戰機，性能比美軍戰機還要強，你有神風敢死隊自殺式直撞美艦，我有神級機師直搗黃龍炸沉日艦，雙方打得死去活來，一如以往，Roland Emmerich交足功課，連場多角度埋身重現海空激戰，目不暇給，超強機師Jimmy Doolittle人機合一，駕駛神乎其技，好比《壯志凌雲》Maverick角色靈感之源。

        片首以二次大戰前夕，美國情報官Edwin T. Layton與日木海軍總司令山本五十六雙方會面對話，已埋下偷襲珍珠港伏線，繼而令Edwin將功補過的決勝過程，截聽解碼不容有失，成為戰機空中搜尋敵方艦隊重要關鍵，個人而言，反想了解當年真實戰場下，戰機是否同在如此密集式槍林彈雨迎面交鋒？因為根本避無可避，同睇《天煞地球反擊戰》沒分別。

        完場只想到「中規中矩中途島」作總評，不吐不快，是當年有最新「Sensurround」作招來，如今花費一億美金製作費，竟連Dolby Atmos杜比全景聲都冇，先打八十大板，如此講求優質戲院影音享受新世代，理應好明白觀眾入場睇戰爭片，十居其九想得到官能刺激視聽之娛，或許，不少影迷選擇留待出碟在家好好享受更實際，絕對事出必有因。

(原文刊於U Magazine@21/11/2019)