《講鬼故》: 尋冤待說趕鬼故

　　入場前，還以為《講鬼故》 是同你講鬼故，即是九十年代《Tales From The Crypt》幻海奇情式短篇玩法，結果，又再是Stephen King仿真品，左拼右砌集大成，弊在鬼故設定似曾相識，沿途四平八穩，驚喜欠奉，恐怖片最忌恐怖氛圍不足，及血腥暴力就住嚟拍是最大通病，《講鬼故》差不多全犯齊。

　　美國小鎮萬聖夜，幾個同學仔入鬼屋中伏出事，典型《伴我同行》無限延伸，食住《怪奇物語》加《小丑回魂》互動效應，再來一本鬼書逐個捉，形同《死亡筆記》與《死神來了》變奏互動，厲鬼原是悲劇人物，類似《咒怨》式怨氣來襲，最後尋冤待說趕鬼故，同鬼講鬼故破解世紀咒怨，你話是否樣樣有啲炒埋一碟？

　　這不緊要，只要死神逐個捉夠嚇人就合格，點知捉到鹿又不識脫角，Tommy與稻草人Harold憎恨來由零交待，到稻草人喪屍求其出沒兩下，Tommy下場預料之內，你會以為睇緊《迷離境界》，那麼，宣傳海報主銷恐怖爆瘡場面又如何？面瘡特效時大時細，異蟲爆瘡始不及異形爆肚，就是拍不出令人毛骨悚然的懾服力。

　　至於惡魔來找大拇斷指，Auggie床底快閃被消失，何只草草了事，直情見慣見熟，難得導演仍可照拍不理，那個甩手甩腳的解體怪物The Jangle Man，搞笑多過嚇人，還有一隻大肚腩肥腫浮屍，似玩整蠱觀眾多一些，兩者同樣媲美鹹蛋超人特撮片怪獸造型，到底你想點？

　　相比之下，厲鬼Stella所屬的Bellows家族水銀食水殺人事件似乎想知更多，可惜不是主線，只作旁敲側擊，點子跟《小丑回魂》同出一轍，由舊聞傳說衍生的少年冒險故事，問題在於人物欠個性，怪事欠新意，追看性疲弱，倒不如主拍Bellows家族有幾恐怖，Stella如何為公義企圖公開真相，反遭家族老屈成精神病人被囚禁，本是一個很吸引的逆權烈士故事，總言之，就算有Guillermo del Toro掛名監製及故事創作，也不得不說是失手之作。

(原文刊於U Magazine@5/9/2019)