埋單的桶子

        2007年積尼高遜主演過一套《玩轉身前事》，英文片名為《The Bucket List》，意指「死前遺願」，即是死前想做的事件清單，睇完令人即時有種「想做就去做」的人生啟示，然而，到底我們應該在生前盡做「想做就去做」之同時，還需要為死後做定事前準備呢？

        近年，電視廣告似乎不斷提點大家好好做定死後準備，論最高曝光率，最成功入屋的一個「安保」廣告，找來姜大衛同你講：「最鋒利嘅刀都總有生銹嘅一日！」，心想下一句其實好應該接上：「更何況係《獨臂刀》！」，點知佢就偏要說出：「何況係人呢！」如是者，晚晚定時定候洗腦式輸入法，搞到55歲以上嘅觀眾都忽然自動對號入座，引導大家想到要計劃人生最後一件事，最重要仲有呢一句「無謂做成子女嘅負擔」，此話真係好有感染力，首先，老人家有共鳴之餘，做人仔女嘅，聽後又會點諗？

        幕後創作撰稿人肯定身同感受有共鳴，果然好有生意頭腦，如此輕易賺取大家The Bucket List入面的最後一筆錢。

        誘完你有生銹刀都唔識攞去磨之後，又再來另一個「永念」樓盤廣告，既然生前死儲爛儲都買不到一層樓，好應該死後為自己買一個最後容身之所，不過，就算死後都依然好難留魂在香港，因為呢個係來自濠江嘅「永念」新樓盤，每晚深夜見到呢個廣告都有種冷酷人生嘅觀後感，點解大家無論生前死後都要如此盲目追捧豪宅，甚麼「依山面海而建，背靠大潭山，面向南中國海，環境清幽安靜…」，不知者還以為是一般豪宅樓盤廣告，實在，「永念」這個名字除了是在生的人對故人的思念外，根本亦有「死不眼閉」，對生前追求奢華生活永念不忘之意，同樣地，又是生意人想出來為賺取大家The Bucket List入面另一筆最後投資。

    《秋天的童話》船頭尺曾經說過：「一個人到死時最好就係一個仙都全部用哂！」

        近期，Swing有一首告別之作〈那邊見〉，Wyman就巧妙借用生離死別嘅人生定律，套入Swing曲中人散嘅主題，開首即唱出「有些人太早了斷，有些人去得太突然，有些人看到了光線，踏前，更多人看不見…」道出人世間變幻無常，你同我今天有緣遇見，難保明天後會有期，最終大家都可能盼望有天可以在那邊見，副歌是這樣的：「行前行後只差一線，時辰來又怎可挑戰，自然，閤眼衝線，重頭換個新的開端，就算不太像個樂園，也算是得到某些改變，別嫌，約親朋，那邊見…」愈聽愈有感觸落淚的衝動。

        聽完〈那邊見〉，同時又令人想起謝安琪〈十二月二十二〉，跟〈十二月二十〉是上下集之作，阿Kay為我們先後預習2012末日前後嘅心理準備，今回末日過後竟換來一片重生嘅新希望，完全將「置諸死地而後生」呢個概念呈現眼前，歌詞提到「原來終於到這天不用懊惱，不需再早出趕生計，晚歸很焦躁…」一種莫名其妙嘅感動心靈效果，一首淡然無奈嘅Ballad小品，對活在當下嘅每一個你我他，帶出無盡嘅反思啟示，萬般帶不走，唯有業隨身，倒頭來，一切其實都只不過是空氣。

        你的人生最後一桶單已準備好未？希望內容不會像那些年在IFC天橋遺下的那個Bucket就是了！

（此為2014修改版本 / 原文刊於AV Magazine @ 14/11/2011)