始於
2003年,
「睇驗生活」專欄AV Magazine刊出,至2013年6月完結, 沿途分享音樂、電影、電視、廣告、生活、時事…多元感想, 由個人週記化成民生紀錄, 如今首度網上改版重生, 回味十年喜怒哀樂, 繼續延伸未來僅存的共同記憶體

2014年6月3日 星期二

《哥斯拉》:浪漫是斯拉本性




  
   16年前,多得Roland Emmerich玩「Size Does Matter」一味搞破壞,連日本Toho都不想承認這個錯版哥斯拉,全程傻瓜般在紐約大步亂走,睇完都唔知哥斯拉究竟想點?講真,今次入場前陰霾未散,慶幸總算撥開雲霧見斯拉。

  開場即來日本核電廠大災難,又有菲律賓大海嘯及核爆歷史事件簿,惹人聯想是否天災人禍本是同根生的陰謀論,清晰交代核能怪獸Muto的來由,哥斯拉出沒注意亦條理鮮明,好比傻瓜變超人大逆轉,正貨終於尋冤得雪。

  全片拍攝構圖美感型格極其講究,棄綠玩紅,原著經典氛圍升呢重現,嘗試以大量側寫角度旁觀怪獸戰場,如機場大堂內的Track-Shot設計,及架空電車碰上Muto來襲舖排,臨場實感媲美JJ Abrams《末世凶煞》現場追撃同步迫力。

  末世浪漫揮之不去,降傘兵團紅煙劃破灰天,唯美得難以言喻,主角Aaron著陸前近距怪獸掠影又是一絕,雌雄Muto情定中華街,大紅燈籠高高掛世紀之吻背後,似是美日友好關係不尋常的怪胎作惡,踐踏中國肆意揚威的暗示密碼。

  對於日本特撮迷來說,飛天Muto型態及哥斯拉口噴電光交足功課,城市戰場美指一絲不苟,Aaron父子潛入核污染禁區,極似PS3電玩《絕體絕命都市》真人版,Muto如何從核研基地破囚而出亦見張力十足,整體比《悍戰太平洋》好睇得多。

  美軍不再對哥斯拉喪亂開火是好事,就連招牌怒吼忽然男人味濃,完場前見其背影又再獨步下海潛行,好有詩人獨憔悴又「豆腐火腩飯」Feel,奇在牠入水可靈活避開戰艦,上岸卻總論盡掃爛高樓大廈,是好嬲定好笑?

此為修改版本 / 原文刊於U Magazine@23/5/2014)