「We Don’t Need To Waste Time！」
你家陣秒秒鐘幾百萬上落呀？你哋一直「Waste Our 血汗Money」都未同你計，以後不如所有政府官員見記者扑Mic，全部只用普通話對答一次，順便同你最重視嘅皇上匯報埋，大家想聽廣東話英文版本，自行用Translator App重溫喇笨，We Don’t Need You To Govern Hong Kong As Well!
「唔等於我冇招！」
你真係冇蕉噃，阿嬸！你敬愛嘅上帝做你出嚟果陣，就係冇蕉，本來無一蕉，何處認有蕉？
「無乜驚喜，等於無乜驚嚇！」
請搞清楚，驚喜同驚嚇係兩個唔同意思，以為自己好醒有急才玩接字，你唔好話等於無乜經期？！呢個只有你先知！
「天堂預咗位俾我？」
即係自我免責就唔駛落地獄？講到好似去飲茶致電留座咁方便？耶L冇藥醫，神會打9你！大家終於明解你自以為好叻叻果句「官到無求膽自大」，原來又係口不對心嘅真心話，呢頭話自己無求，果頭又求神留位俾自己？！
「為義被難真有福？」
成日自言聽到神嘅聲音，有幻聽就要睇醫生，你不如話政府唔係黃大仙，唔係有求必應，港人只有自求多福喇笨！無端端又話你嘅神同你講「為義被難真有福」，家陣是否黃大仙玩解簽，支簽仲要講乜Q堅持做正義嘅事，往往備受責難，做到咁委屈，呢度根本從來冇人想你做，你只係內部認購777票被「陰點」聽命做習奴，更何況你講過做特首係神嘅主意，神又係你，鬼又係你，駁少句喇，唔該！
「就住頭先所講嘅「甩轆」事件」
而家講緊係高鐵出軌事故，係關於鐵路路軌問題，你個「扮毛澤東頭」竟然諗到婚外情，搵你做運輸及房屋局局長，開會連「出軌」同「甩轆」都唔識分，仲要用英文解說死撐「detachment of wheel」同「affairs」之別，2005年有套西片叫做《Derailed》，港譯都係叫《出軌》，都係講婚外情，又冇人識用「Derailed」呢個例子即場駁番佢？！
「我希望大家都用科學同實踐態度處理」
你個「扮毛澤東頭」即係反對抽樣鑿開石屎檢查鋼筋呢個建議，咁請問點樣用科學態度處理，唔通用X 光透視檢查？而家係講緊剪短鋼筋嘅安全問題，人命悠關，你仲講乜科學理據支持，抑或有心護短，社會上而家流傳緊一個要你下台嘅說法，你又希望大家用乜嘢實踐態度處理？
(原文刊於am730亞里叭叭專欄@1/8/2018)
沒有留言:
張貼留言