亞里叭叭 : 呢度就係冇on demand！

　　最近，除了網民最人氣商品寶礦力水特廣告事件外，亦同時睇到以下兩個電視廣告，睇完一次，你可能會問：「究竟而家啲廣告人係點諗嘢？」

　　某晚，開著電視沒看畫面，聽到這樣的一個廣告，一男一女不停重覆在叫「阿糖」與「阿廖」，即時反應係：搞乜呀？然後，看一看畫面，原來係糖妹同廖啟智兩人在互叫對方，糖妹嗌「阿廖」，智叔又嗌「阿糖」，愈嗌愈肉緊，然後智叔就問：「阿糖，你可唔可以穩定啲呀？」，跟住就叫你飲乜乜，原來又係玩「食字」，一切源自同「糖尿」病有關，糖廖x糖尿，哈哈！即時O哂咀！咁都被廣告人諗到又冇Ban到，仲要出得埋街，時代那麼壞，真的現在是爛鬥爛！

　　如是者，以後可能由此掀起玩「食字」配對廣告新瘋潮，例如徐小鳳x陳小春，互嗌「阿徐」與「阿陳」賣「除塵」用品，又或蕭芳芳x卓韻芝，互嗌「阿蕭」與「阿芝」賣「消脂」用品…

　　那麼，林子祥x 鄭少秋又如何？今個八月十五，不妨出埋「林鄭月餅」賀中秋！

　　另一個搞嘢廣告係Now TV宣傳on demand，搵咗林曉峰出鏡扮客戶，再搵埋林海峰不出鏡聲演互動，沒錯，以「林曉峰x林海峰」做賣點，所以林曉峰開門就話：「咦，乜你把聲咁熟口面？」，跟住就由一句「大佬呀！」展開一輪咀「反抱怨」對白內容，主題係「Now TV唔甩得」，全程聽到佢不斷講好多節目好睇到唔甩得，搞到佢同家人左右做人難，最後表現極之惆悵地提問：「有冇得掹？」

　　然後，大佬就答佢有得掹！因為Now TV有on demand！

　　又係玩「食字」，有得掹因為有on demand，總比直嗌「阿糖」「阿廖」有多少少諗頭，講真，其實每次重看聽到林曉峰扮抱怨一輪咀又確係幾煩厭，不斷強調唔甩得唔甩得，講到好似睇Now TV 睇到吸毒上癮唔甩得，是否暗寸敵台有線用戶想Cut都唔Cut得呢？

　　此時此刻，反令我想起2006年Adam Sandler《命運自選台》，也記起「如果，命運能選擇，十字街口你我踏出的每步無用困惑」這句歌詞，年少不一定無知，因為舊日所相信堅守的價值，今天發現還未老，也不必接受壞時代的糟蹋。

　　對本土香港人來說，就只怕中港關係，唔甩得，中共治港，唔甩得，咁我哋仲有冇得掹？Sorry，呢度就係冇on demand，乜都冇得真正自選！

(原文刊於am730亞里叭叭專欄@17/7/2019)

狂噪廣告

　
　　　如果你是標準球迷的話，相信應該都對以下體驗有同感，尤其是夜半睇波之時，真的經常慘受「失驚冇神嚇親你」之苦！

　　所說是兩個收費電視台的足球頻道，不知何解，不約而同都發生音量失衡的嚴重問題，每到直播賽事之時，現場旁述總是比平時聲量細了一點，於是，大家通常都會自動將音量提昇起來，不過，一到中場休息，廣告時段播出之際，就忽然變得非常之大聲量，「失驚冇神嚇親你」絕非跟你講玩，尤其歐聯及西甲的宣傳片段一出，簡直睡著都會被即時被嘈醒起來。

　　一般來說，經驗所得，是直播時段跟廣告時段的音量對比，平均約有十度之差別，而其中更以有線體育台明顯較Now Sports來得更細聲許多，真不明白，到底為何會有這樣嚴重的音量失衡問題，有關方面是否可以多加留意，只因直播賽事全屬夜半時份，用戶絕不想令家人發生擾人清夢的情況。實在，有線電視頻道整體音量平均都比Now 及一般電視頻道偏細聲一點。

　　於是，近期亦開始多加留意其他電視頻道的音量問題，且慢慢找出一點線索，發現原來本地好多電視廣告的音量本身，經常有過大聲問題之嫌，好多廣告都好似誓要「先聲奪人」才肯收貨，就算你沒有看著電視畫面，也要靠聲浪向你殺埋身為止，總之，為求在15或30秒內，無所不用其技，強制性向大家不停洗腦。

　　當中有好多廣告真的吵耳到極，短短十幾秒，旁白可以由頭說到尾，配樂可以由頭嘈到尾，還有一些「語不驚人誓不休」的音效聲，全部填到密不透風，成件事最後得一個嘈字，最弊是後期混音連基本Balance調教都好似沒做到，通通推到最大聲為止，我會形容這些為「狂噪廣告」！

　　兩大超市每星期定時定候的所謂「先加後減扮超低價優惠」推介，例必大聲公宣佈得聲嘶力竭，旁白如街邊小店「天天最後今天大清貨」式人肉錄音機喊通街一樣，黃金時段不停洗腦入侵一眾C9耳邊，絕對是「狂噪廣告」示範之一。

　　另一個由本地樂隊做代言人的靚聲耳筒手機廣告，先有樂隊本身主唱的廣告歌背景，當然是玩他們一貫Pop Rock，主唱部份居然是「La La La….」如在唱沒有歌詞的Demo版本那樣，已夠難聽又嘈吵又騎呢，旁白還要是一輪咀力Sell呢部手機有乜功能之餘，更有大量英文名字連珠爆發，總之全程嘈鬥嘈，你是永遠都聽不清楚到底他在說甚麼？

　　至於某醫生主唱的〈小明上廣洲〉，竟先後成為港鐵及港府的兩首宣傳廣告歌，曾幾何時，黃金時段幾乎每15分鐘播放一次，每次聽到都總要即時按下Mute或轉台才可救回一命，真的聽到人都要嗌哂救命。

　　又有一個「狂嗌綠色」扮特工找目標人物的飲品廣告，那個狂燥幕後主腦不斷大嗌「綠色！」，為求營造扮哂警匪動作片緊張氣氛，又是嘈得有點討厭，最後揭盅由綠色變高纖又是夾硬來，以為好幽默，實在笑不出聲。

　　　
　　至於近期最嘈最狂噪廣告之一，呢個甚麼「惜食為香港」必屬三甲首選，真唔明解好多廣告如此喜歡用上這種娘到爆的數白欖Rap Talk，今次呢個「惜食為香港」就更加一味得個嘈字，人聲推到大一大，音樂聲細到蚊滋咁細聲，Mixing嚴重失衡，嘈到想即時轉台。

（此為2013修改版本 / 原文刊於AV Magazine @ 17/4/2012)

賣手機的戇爸爸

          近期,  大家或對一個「胃信」戇爸爸與笨小孩的電視廣告留下印象，此廣告絕對有好多玄妙之處值得一談，首先，廣告內容以阿仔問老豆：「點樣將舊手機資料搬落到新手機度？」為主，然後，就此搞到戇爸爸日思夜想，心力交瘁，甚至有點變得痴痴呆呆，最後，全靠佢識得走去「胃信」才得到解決方案。

        最弔詭，呢個戇爸爸本身原是另一間手機專門店「乜都得」Sales，佢除左唔識得幫阿仔點樣將舊手機資料搬落到新手機度之外，仲搞到開工之時，痴痴呆呆面對顧客，而且，最後甚至係著住「乜都得」制服走入人哋號稱全港No.1手機專門店的「胃信」，然後四萬咁口開心而歸。

        到底，「胃信」是否想暗示同行不一定如敵國？即是暗示「胃信」每日都中門大開，歡迎同行如「數碼窿」、「PCC Dub」、「溫吐Free」…等sales隨時光臨問問題？還是想冷嘲熱諷行家扮哂「乜都得」，其實根本「乜都唔得」？抑或想暗示隨時歡迎你過檔呢？

        另一角度再仔細一看，到底係阿仔定阿鬼，點解有幾個鏡頭拍到阿仔好似冤魂不息在報夢咁恐怖，其實，阿仔又點解要換新手機？既然自己都識得話係部舊機，唔係壞機，即係貪新忘舊，是否已鼓吹小朋友都要學大人一樣要不斷追新款趕時尚為榮，又要問點樣將舊手機資料搬落到新手機度，唔識用就唔好換過部新機喇！同時，阿仔呢部新手機又係如何得來？如果係戇爸爸買給他，為何戇爸爸自己都唔識點玩部新手機，別忘記佢都係手機專門店「乜都得」Sales！

        所以，如果可以全新演繹的話，此廣告可能會是這樣：

    『當阿仔手持兩部新舊手機問老爸：「點樣將舊手機資料搬落到新手機度？」，戇爸爸頓時發呆，是因為佢心想阿仔何來這麼多錢換新機？根本就從來都唔想幫佢將舊手機資料搬落到新手機度，於是日思夜想，最終想出解決妙計，就係將阿仔部新機拎去隔離「胃信」Trade-in，收回現金，即時四萬咁口！當然，如果變成恐怖版本，就係阿仔根本不存在，原來只係晚晚報夢戇爸爸要整手機，隨時係另一集幻海奇情故事！』

        同一港空下，另一邊廂，另一個政府宣傳片，另一位小朋友卻沒心機在說：「爸爸病咗，醫生話佢有癌病，要食好多藥…」都是那一句老生常談，幸福唔係必然，戇爸爸有一日都有可能不幸會變病爸爸，只想真心向所有為人父者說一句：「你真偉大！」

（此為2013修改版本 /  原文刊於AV Magazine @ 8/3/2013)

Bonus Track : 不要只待父親節降臨時，透過傳媒商品的廣告宣傳濫情提示下，每年一度才想起要跟爸爸說一聲「我愛你」，歲月不留人，回憶可留痕......眼淺的，請先準備紙巾。

鑄富祭民

    你而家冇，但係將來會有；將來，就係下一秒：還以為曾江又賣緊白髮變黑「得咗」廣告？.....

　　　以前有一個金融投資廣告，由金像影帝做主角，全程背景盡是金光閃閃，只見他一邊慢行一邊同你講古，先來一句「投資財富，即係投資幸福」，嘩！絕對是香港人最典型的搶錢人生觀，有錢等於有幸福，冇錢就要揸碌竹！然後畫面就緊接出現一塊塊印有「1 Kg Gold 9,999」黃金，沿途一味好「掁眼」，你係咪好想擁有呢？

　　終於入正題，金像影帝語重深長地講古：「當年有人同我講，你而家冇，但係將來會有！令我堅信投資一定要揾最信懶嘅人！」嘩！好禪呀！好似大師名句：色即是空，空即是色！你而家冇，但係將來會有！你而家有，但係將來又會冇！係咪好玄妙呢？我都想補說一聲：「我堅信頭脂都一定要搵最信懶嘅髮型師！」

　　到底當年係邊個同呢位金像影帝講出呢番金句呢？最後又係一個不解之謎！我會反問：「唓！當年有人同你講啫，又唔係同我講，而家你金像影帝又忽然同大家講，咁樣，我即係要信當年某人，還是要信你金像影帝呢？你又懶神秘咁話「當年有人同我講」，又唔直接話「當年XXX同我講」，如是者，我哋都起碼得個知字呀嗎！XXX其實係咪就係你老闆楊生呀？」

　　睇番呢位金像影帝，佢近幾年又真係好似行緊運，佢以前冇攞過金像影帝，而家又真係有得攞，果然同「你而家冇，但係將來會有」有互動效應，信佢，你將來都會有！你又信唔信？

　　同時，大家應該尚記得一個「又係好金」嘅電視廣告系列，係俾港人鬧到好甘嘅強積金，全程玩Cute唱歌仔，每首歌曲都有唔同主題，好似有「淡淡定，淡淡定，有錢剩，穩中求勝！」，「抱你到大，乖乖聽話，得到保證，回報！」，「心裡有個分寸，風險高，你要知道，潛在回報高，風險一樣高！」，「保保守，慢慢等佢收息，收息」…悉隨尊便，任君選擇。

　　　回應對上「投資財富，即係投資幸福」，呢個強積金電視廣告系列又似乎多一點溫馨提示，凡是投資都總會遇上一定風險，倒頭來是禍是福，真係天知曉？試問真係有誰可以百分百同你肯定「你而家冇，但係將來會有」呢句美麗的X言，是真是謊，同樣天知曉？政府要你強積，商人誘你鑄富，官商勾結奪命金！

　　人生中，確係會出現好多「你而家冇，但係將來會有」，又或「你而家有，但係將來會冇」際遇，好似：

童年時：「你而家冇體毛，但係將來會有」；

少年時：「你而家有暗瘡，但係將來都未必會冇」；

成年時：「你而家冇工返冇拖拍，但係將來可能一樣冇」；

老年時：「你而家冇人冇物冇所謂，但係將來....還會有將來嗎？」…

（此為修改版本 / 原文刊於AV Magazine @ 1/7/2011)

後記：2010年「你而家冇，但係將來會有」，估唔到，三年後的今天再玩續集同你示威，金像影帝做完「線人」戴金袖口鈕，扮哂淡然向大家宣佈：「以前冇嘅，我而家有喇！」，全因有佢自稱形容為「實力強大嘅」後台撐腰做「同謀」，再三強調多一次「將來我相信會得到更多」呢十個字，你今次睇完聽完做埋「証人」，有冇好後悔三年前冇信佢投資財富呢？你又一定記得佢最後好Cool咁同你講：「將來，就係下一秒」，就好似柴九果句「人生有幾多個十年」一樣，等同「人生有幾多個下一秒」，全程又再交足另一場金像級好戲，最後到底是鑄富人生，還是鑄成大錯？還是投資我們的財富助你完全攻陷羅素街呢？！

提醒大家，金像影帝今次「鑄富」演出所說的一切「以前冇嘅，我而家有喇！」個案，根本就完全跟呢個投資廣告毫無關係，說穿了，只是一個偷換概念的轉移視線技法，讓大家好自然將金像影帝成就跟「鑄富」投資連繫，實則本是金像影帝自己努力成果，難道因為他有「鑄富」投資，就「以前冇嘅，我而家有喇！」咁神奇嗎？

Bonus Track：給所有拜錯金的，還是最愛呢一塊〈Gold〉。