《獸頭救兵》: 人，何嘗又不是動物？

        到底係《獸頭救兵》抑或《壽頭救兵》？買票時，恐怕你亦會將「獸頭」說錯成「壽頭」也說不定，最諷刺是，今時今日，原來國難遇上壽頭做救兵已算執身彩，慘得過魔頭扮救兵，死路一條，可以笑的話不會哭，《獸》開宗名義同你講天無絕人之路，完場後，點解完全feel唔到？全因為人何嘗又不是動物？

        請先搞清楚，宣傳挾著「《炸雞特攻隊》製作公司，又一瘋狂野笑話題作」之名，實非出自《炸》同一創作班底，論爆笑密集度，根本差天共地，唯一共通點，同屬「失業當自強」主題，為保飯碗，你可以去到幾盡？大財團買賣地皮玩手段，利用出賣動物園存亡做禍心，一個沒有動物的動物園，唯有園工扮動物自救，咁都得？

        所謂「野笑」正是幾位主角笠住獸頭引你一笑，問題是空有噱頭，笑料不足，除了猩猩恰如其份融入角色憤怒個性外，其他為扮而扮欠互動，hea爆獅子同埋星戰Chewie版樹櫴可有可無，戲裡戲外，唯獨北極熊飲可樂成為重要轉捩點，既令動物園起死回生，亦成就可口可樂一個經典神話。

        主角太洙直言YouTube世界就是靠真假難分嬴得點撃率，揶揄現代人隔mon觀物，多過見過實物，乜都輕易信以為真，這不就是《動物農莊》入面，當動物看見與人類平起平坐的豬，再看人類，意識到他們也難再分辨哪是豬？哪是人？可惜《獸》並未再借題發揮，編劇力有未逮，壓軸真假北極熊兩相遇，CG瑕疵影響戲氛，結局成功逆權扭轉乾坤，整體兒戲非常。

        畢竟動物園在商言商，動物只是搖錢展品，人類何嘗不是自困於金權操縱下的另類動物園？到底我們為何仍要建設動物園違反大自然生活定律？其實笠住獸頭本是一份苦差，並不好笑，真亦假時假亦真，這裡真有海洋公園嚴重財困，《魚頭救兵》扮海豚海獅熊貓嘗試自救有冇得搞？

(原文刊於U Magazine＠20/2/2020)