《詭修女》: 修女又做大嘥詭

　　James Wan《詭屋驚凶實錄》系列支線詭角副產品，全程刀仔鋸大樹，捉到鬼唔識發惡，客串明明眼前一嚇，擔正立即虎頭蛇尾，詭娃大失所望後，詭修女又接力做大嘥詭，一味只玩jump-scares聲效嚇人，劇本就粗疏得求其了事，真係「悶Nun到」呢！

　　不是說粗口，呢間1952年羅馬尼亞詭修院，個個修女也瘋狂，神龍見首不見尾，喜歡背向他人，十問九唔應，每次出場真係「悶Nun到」，睇到人好忟憎，話說原來詭修院地牢有一度地獄之門，同《悍戰太平洋》海底Portal一樣，主角詭修女Valak正係「所羅門72柱魔神」之一，沒錯，《祖孽》Paimon同門師弟是也，真巧合，下次不如玩crossover拍《詭孽》。

　　全片攝製慳水慳力，九成時間處於暗黑狀態，以查案神父Burke、見習修女Irene及屍首發現者Frenchie修院困獸鬥，加埋村民不斷強調呢度好邪，終於輪流碰上類似《陰陽路》鬼玩人得啖笑，神父活埋墓穴叫天不應，惡靈偏又留個嚮鈴給他求救，究竟你想點？

　　問題是，來來去去兩三個修院室內景為主，觀感已夠單調乏味，神父修女想同悶Nun互動，又傾唔到半句，劇情長期處於拉布狀態，連神父驅魔個案都要舊事重提一番，詭修院自由行靈探拖拖拉拉個幾鐘，就只待最後廿分鐘Valak壓軸出場，可惜，論驚嚇氛圍，完全跟《詭屋驚凶實錄2》初邂逅的不寒而慄相差甚遠，零舖排硬jump-scares連場，粗枝大葉，嚇人心思欠奉。

　　見習修女最後臨危受命，升呢做正規修女打大佬，生死關頭出絕技，含血噴鬼不難估，Valak錯愕表情才是估你唔到，媲美《星戰最後絕地武士》黑魔王Snoke突然被KO一刻，完場前，再跟進連繫上華倫夫婦前因後果，任你點說都得，也無關痛癢，就只記住「悶Nun到」3個字離場，據知「詭」系副產品下一套輪到《The Crooked Man》，除非James Wan親自操刀，否則難逃大嘥詭收場。

(原文刊於U Magazine@28/9/2018)