《壞蛋獎門人3》: 還是覺得兵團好

    《壞蛋獎門人》系列最成功入屋必屬迷你兵團，第2集已強烈顯示兵仔大過犀利哥，講真，玩非常特務始終鮮味有限，任你如何主力設計一個新奸角亦於事無補，犀利哥不是Austin Powers，既有壞蛋基因，又要改邪歸正，自相矛盾，唔知想點，兩頭不到岸，首集尚算夠衰格扺死玩整蠱，之後就愈見模糊不清，吸引力大減。

        今集大奸角鬍鬚柏玩80s懷舊夠啜核，過氣壞蛋明星處心積慮，由夢工場轉化實戰劇場，誓向荷李活大報復，全程沿用大量80s元素變成神奇武器，穿插不少80s流行曲作配樂，MJ及娜姐的「勁舞鬥一番」好玩有Fun，將自己昔日名作的角色及劇情，照板煮碗重新上演，壓軸出動機械人來襲，概念似足浦澤直樹《20世紀少年》，不過，跟上集一樣有頭威冇尾陣，搞完一兩場大龍鳳，就求其輕易就擒，草草收場。

        犀利哥遇上中年失業危機，導致迷你兵團出走離隊，非常特務跌落谷底待翻身，似曾相識，不就是《超人特工隊》變奏版，一家五口發揮團結力量精神，小愛女Agnes出售至愛獨角獸公仔補家計，笑中有淚，出奇感人。

        當然，犀利哥玩雙胞胎，重遇失散孖生兄弟巴閉哥，編劇是否吳宇森迷，向《英雄本色2》玩暗中取經，巴閉哥髮型及超級富豪形象似足Donald Trump，跟犀利哥來個高山低谷的相形成趣，兩兄弟一財一武合力抗敵，企圖製造衝突笑料，可惜事與願違，二人黑白雙煞互扮對方一幕，簡直笑不出聲。

        一如所料，全場笑位又再落入迷你兵團身上，誤打誤撞走上 《Sing》歌唱比賽節目，獻唱《Papa Mama Loca Pipa》人聽人愛，黃勢力玩轉《監獄風雲》做大哥大，再來升空逃獄大計，人人笑不停，眾望所歸，還是覺得兵團好；值得一提，負責原裝英語版本鬍鬚柏幕後配音的，正是《South Park》原創人Trey Parker，而Nefario博士玩被冷藏的設計，擺明向《帝國反擊戰》致敬，不妨留意。

(原文刊於U Magazine＠6/7/2017)