真心話，最好的Michael
Bay就只有《重案夢幻組》及《石破天驚》兩套出道代表作，頂多再加埋《謊島叛變》，其他不用多談，《變形金剛》首兩集尚可以，整個系列本是一場拉布不歸路，愈拍愈沒精打采，恨變不成戲。
今集是終極戰士，還是最後武士已不緊要，Michael Bay當然想最後冇事，本片只徹底証明「爛鐵沒有三根釘」，一個5分鐘可以講完的爛故事，只剩主角一堆廢話「拖拖拖」，加一堆爛鐵「變變變」，及炒耳連場「澎澎澎」，雖換上不同配樂人，卻繼續依據源自Hans
Zimmer原創招牌式壯麗配樂大反差，剪接花多眼亂，節奏亂七八糟，花兩個半小時入場疲勞轟炸，是高消費的自虐行為。
每次聽到柯柏文懶語重深長的不耐煩旁白，總想將它即時滅聲，今次不斷提及點解他們經常來地球，強調外星人與我們常在的真相，然後又話說遠古英國亞瑟王黑暗時代，梅林法師已跟變形火龍合作，不只為狂博兩派之爭留伏線，更揭露老變製造者女魔頭Quintessa殲滅地球大計，幾位主角眾裡尋他，又城中尋寶，愈睇愈似《達文西密碼》加《驚天奪寶》，弊在排面明明很緊張，偏偏打呵欠到口不停張。
點解Quintessa隱藏星球咁似傳聞中的Niburu？點解世界末日在倒數，生死關頭，Anthony
Hopkins還可以慢條斯理帶大家參觀他的古堡博物館，聽他細說家族史？點解壓軸破局變成石中神劍都得，連《魔盜王5》剛剛先玩過？點解拍足十年，套套女主角都例必要似Megan Fox？點解荷李活成日都要有The
Chosen One？點解今集咁多疑似《星球大戰》變種機械人？點解Michael Bay仲以為自己好識拍幽默Gag位，而全場可以零反應？
最大問題是，點解我睇的2D版，全程竟是「變形畫面比例」，一時全畫面，一時16:9，每隔幾秒密集變形，比變形金剛還要變得多，非常礙眼，完全影響觀感，何況本身已夠爛，認真嘥乜戲！
《變形金剛》再沒完沒了如此求其拍下去的話，只會跟年初二煙花一樣討人厭。
（原文刊於U Magazine@29/6/2017)
沒有留言:
張貼留言